Balade 926 : De melin meleche, Regnault (MCCCLXIII)
Sote Balade de Messire Regnault d’Angennes
De melin meleche, Regnault,
Et de l’orde mater basse
Parléz voulentiers bas et hault
Aux dames et en toute place,
5 D’estront, de bran ou de poitrace,
De lechier le boyau cullier,
Melin devant. leche derrier !
En tel trou fussiéz vous repos !
Boutéz vo nez en ce bourbier :
10 En vostre bouche a de beaux mos !
Merde[1] par la gueule vous sault.
Mieulx restoupéz vostre besace
Et vo[stre] cul, qui est herault.
Faictes restrainde sa crevace :
15 Tousjours poit, vesse et se soulace
De faire truies approuchier,
Et se sent par tout au flairer[2],
Et vous de li estes trop sos,
Quant vous dictes « Je vois chier »,
20 En vostre bouche a de beaus mos !
Certes bien fait qui vous assault
Et qui en sus de lui vous chace,
Quant de vo cul tel cri vous sault,
Qui tant de bran toudis amasse.
25 Faictes esmeraude et topasse,
Le feu d’enfer le puist mangier !
Voist sur un povre boulengier
Paistre les pourceaulx ou au bos !
Tousjours parléz du bas mestier, 382d
30 En vostre bouche a de beaus mos !
L’envoy
Dames, mauvais feroit couchier
Avecques ce bon chevalier
Regnault de Trie, qui n’ot clos
Le cul depuis un an entier.
35 Dictes lui : ― D’ordure rentier,
En vostre bouche a de beaus mos !
[1] Ms. Toudis merde
[2] Raynaud corrige en flairier
