Balade 925 : Se beau parler faisoit homme assagie (MCCLXII)
Balade
Se beau parler faisoit homme assagie 382b
Et beau maintien faisoit constance avoir,
Homme juste pour sa face amaigrir,
Pour simple habit les autres decepvoir
5 Et pour mentir sembler que ce fust voir,
Chascun vouldroit faindre et dissimuler,
Car [de] telz genz font maint homme aveugler
Par le semblant que faulx par dedenz cueuvre.
Qui le cuer a fier comme [a] un cengler,
10 Fy de semblant, se dedenz n’a bonne euvre !
Telz parle bel qui ne se scet chevir,
Telz se maintient qui a po de pouoir,
Telz semble bons par sa face polir
Qui a le cuer vain, orgueilleus et noir,
15 Et telz se fait par sa robe apparoir
Humbles et douz, qui vourroit estrangler
Et qui esmuet pluseurs par son jangler
Tant que son fait et mauvestié descueuvre,
Et que l’en puet bien ce mot averer :
20 Fy de semblant, se dedenz n’a bonne euvre !
Mais au jour d’uy qui scet faindre et polir
Ses mos couvers et taire son vouloir,
Faire semblant de povreté souffrir,
De biau parler, de bien ramentevoir,
25 Adonc fera pluseurs gens esmouvoir,
Par son venin couvertement mesler
Avec le miel et en la foy errer,
Tant qu’en la fin la grant mauvestié s’euvre
Par croire tost sanz le voir esprouver :
30 Fy de semblant, se dedenz n’a bonne euvre !
L’envoy
Princes, qui veult droicte voye tenir,
Vaine gloire doit en son cuer pugnir.
Presumpcion d’estre bon ne recueuvre.
S’il est mauvais, que vault son abstenir ?
35 Car au derrain lui fault honte avenir :
Fy de semblant, se dedenz n’a bonne euvre !
