Balade 924 : Quant j’ay veu et bien consideré (MCCCLV)

Autre Balade qu’il n’est au jour d’ui plus seure vie que de chanoine

                        Quant j’ay veu et bien consideré
                        Tous les estas qui en ce monde sont,
                        Qui grans se fait, qui a fort labouré,
                        Qui a servy les biens que seigneur font,
5                      Qui a cerchié et a val et a mont,
                        Qui est grans clers, qui bien fait sa besongne,
                        C’est tout neant, tele gent repos n’ont :

                        Au jour d’ui n’est vie que de chanoingne.
                        Qui armes suist, il est tost devouré.
10                    Clers se destruit de penser en parfont.
                        En plat pais n’est riches demouré :
                        Qui y maisonne, il se destruit et ront.
                        Sires puissans par estat se confont :
                        Ses despens prins, n’a qui vaille escalongne.
15                    Trop de traveil suefrent marchant qui vont :
                        Au jour d’ui n’est vie que de chanoingne.

                        Car en chantant est leur pain assené
                        En lieu seur, ja ne traveilleront,
                        Leur dreçoir est d’or et d’argent doré,
20                    Vestent fins draps et bien se fourreront,
                        A leur pouoir bien gouvernéz seront.
                        En Crucifix ont noble patrimoingne
                        Et vivent frans. Et puis que tel vie ont
                        Au jour d’ui n’est vie que de chanoingne.                                        369a