Balade 923 : Il vauldroit mieulx l’omme de faim perir (MCCCLIV)

Balade que bonne renommee vault mieux a homme que fin or

                        Il vauldroit mieulx l’omme de faim perir,
                        Tant soit puissans, que mal renom avoir.
                        Renoms mauvais fait tout homme ha[i]r
                        Et sanz cause dommaige recevoir
5                      Souventefois, mais l’en puet percevoir
                        Que bons renoms et sa suite est amee
                        En tous pais, pour ce vous fait sçavoir :
                        Plus que fin or vault bonne renommee.

                        Par couvoitier, par prandre et par tolir,
10                    Par cruauté, par autruy decepvoir,
                        Par mal parler, mal faire, par mentir[1]
                        Puet un chascun mal renom concepvoir.
                        Mais li bons cuers qui veult user du voir,
                        Autruy amer, avoir langue afrenee,
15                    Fait en tous lieux son bon nom remanoir :
                        Plus que fin or vaut bonne renommee.

                        Mauvais renoms fait maint homme mourir,                                     368d
                        Aprés sa mort en valent pis si hoir.
                        Bons renoms fait l’omme amer et cherir,
20                    Au monde n’a si precieus avoir.
                        Face donc bien chascun a son pouoir,
                        Car par le bien sera l’ame sauvee.
                        Et par le mal puet asséz apparoir :
                        Plus que fin or vault bonne renommee.

[1] Ms. souvent mentir