Balade 922 : O serviteur qui aux cours vous tenéz (MCCCLII)

Autre Balade de ceuls qui servent aux cours royaulx

                        O serviteur qui aux cours vous tenéz,
                        Adviséz bien des seingeurs la maniere :
                        Moult promettent quant servir les venéz,
                        Mais du paier va ce devant derriere.
5                      Vo temps perdéz, et briséz vostre chiere.
                        Sanz acquerir, tout despendéz souvent.
                        Ainsi m’en va, si m’en vueil traire arriere :
                        Je muir de froit, l’en ma payé[1] du vent.

                        Quant servir vins, j’estoie bien montéz
10                    Et bien vestuz, l’en me fist bonne chiere,
                        Et n’estoie nulle part endebtéz.
                        Or doy partout, et si n’ay robe entiere
                        Ne cheval sain, s’ay bien cause et matiere
                        De mou doloir ou est foy ne couvent.
15                    Mentir les a estains soubz sa banniere :
                        Je muir de froit, l’en ma paye du vent.

                        Mieulx me vaulsist ailleurs estre occuppéz.
                        Povres m’en vois a ma vie premiere
                        Sanz guerredon, tuit cy garde prenéz :
20                    De plus servir ja nulz ne me requiere.
                        Mais Dieux qui est vraiz juges et lumiere,
                        Rendra a tous ce qu’il leur a couvent.
                        Servir le vueil tant que sa grace acquiere.
                        Je muir du froit, l’en m’a payé du vent.

[1] Ms. mappaye