Balade 921 : Se roys David en son psaultier ne ment (MCCCLI)

Autre Balade du roi David

                        Se roys David en son psaultier ne ment,
                        Le menteur n’yert en terre ja amé,
                        Car son mentir deçoit communement,
                        Dont haiz est, destruit et diffamé.
5                      Mais trop pis siet en prince renommé
                        Vice si ort qu’il ne fait en povre homme :
                        Qui souvent ment moult doit estre blamé,
                        Il n’appartient de mentir a prodomme.

                        Dont vient la foy, a parler proprement,
10                    Fors que du cuer, qui doit estre acesmé
                        De dire voir et tenir fermement
                        Ce que la bouche a par li affermé ?
                        S’autrement fait, il est menteur clamé.
                        Car en mentent[1] son bon renom assomme :
15                    J’en congnois maint qui sont ainsi nommé.
                        Il n’appartient de mentir a prodomme.

                        Mais au derrain, tien ce vray jugement
                        Que li menteur ne seront desblamé,
                        Ainçois aront honte, paine et tourment,
20                    D’onneur seront et de joye affamé.                                                  368a
                        Dieu les harra, de male heure sont né.
                        L’en doit fuir menteresse personne,
                        Car cilz qui ment sera mort et dampné :
                        Il n’appartient de mentir a prodomme.

[1] Raynaud corrige en mentant