Balade 920 : N’a gaires que je m’en aloie (MXXXL)

Balade

                        N’a gaires que je m’en aloie
                        Pour querir mon esbatement
                        O deux levriers que moult amoye,
                        Nourriz d’un let. Mais en alant,
5                      Treuvent un os qu’ilz vont rungant,                                                  367d
                        Dont entr’eulx mut trop grant rios,
                        Et se combatent durement :
                        Deux chiens sont mauvais a un os.

                        A grant paine l’os leur tolloie
10                    Et les desmeslay en present.
                        Mais ainsis que je retournoie,
                        Vy deux gens qui vont riotant :
                        Pour amours ont trop grant content,
                        Car, bien l’entendu par leurs mos,
15                    Pour une dame seulement :
                        Deux chiens sont mauvais a un os.

                        Lors dis que je retourneroie.
                        Si fis je, mais en retournant[1]
                        Viz gens de court, que vous diroye ?
20                    Qui s’aloient fort regrigant,
                        Tous d’un estat, chascun contempt
                        D’estre seulz et d’avoir le loz.
                        Pour ce dit on communement :
                        Deux chiens sont mauvais a un os.

[1] Le copiste a inséré entre ce vers et le suivant la mention L’envoy