Balade 919 : S’argent plouvoit aussis espessement (MCCCXLIX)

                        S’argent plouvoit aussis espessement
                        Que Nothus plut au temps Deucalyon,
                        Et compreist trestout le firmament
                        Comme la mer fist toute region,
5                      Dont le monde par l’inundacion
                        Fut tout destruit sanz le peuple espargnier,
                        N’en cherroit il, selon m’entencion,
                        Sur tout mon corps ne maille ne denier.

                        Esprouvé l’ay par vray experiment
10                    Ou ors estoit et argent a foison
                        Comme pluie donnéz habundanment
                        A pluseurs gens, sanz cause et sanz raison.
                        Mais en la court ne dedenz la maison,
                        Par bien faire n’y poy ains rien gaingnier,
15                    Ne m’enportay de retribucion
                        Sur tout mon corps ne maille ne denier.

                        Mais qui pis est, dont j’ay le cuer dolent[1],
                        Quant l’en me fait quelque assignacion,
                        A moy paier est tout le monde lent,
20                    L’en ne me sert que de locucion,
                        L’en paie ailleurs, je suy l’Ascencion
                        Qui en un point m’a fait son prisonnier.
                        Jamais n’aray, c’est ma conclusion,
                        Sur tout mon corps ne maille ne denier.

[1] Ms. dolents