Balade 917 : Grant honte avoir doit le docteur qui presche (MCCCXLVI)
Balade que le docteur ne doit faire le contraire de ce qu’il presche
Grant honte avoir doit le docteur qui presche
Faire vertus, quant il fait le contraire.
Sa coulpe lors trop clerement l’empesche.
A dure fin doit de son euvre traire.
5 Ce supposé, doit bien crier et braire,
Este honteur, soufrir doleur et raige.
Pierre Mangnin, qui blamoit mariage,
A toute gent deffendoit femme prendre,
Que l’en voit prins et mis en ce servaige,
10 Sa grant folour le fait partout reprandre.
Des maleureux doit bien mener la tresche,
Et a tousjours avoir doleur et haire,
Estre chetis quant il sent la flamesche
De feu ardent qui fait son corps detraire,
15 Par femme avoir qui ne se pourra taire,
Se tout ce n’a qu’il couvient en mesnaige :
Onques oiseaulx ne fut mieulx prins en caige,
Avec le deu qu’il li couvendra rendre
A sa femme povre et de nul paraige :
20 Sa grant dfoleur le fait partout reprandre.
En femme n’a prins qui vaille une pesche,
Et ne scet art pour sa besongne faire,
Et s’est jeune, qui pas ne le despesche
D’enfans avoir, l’en ne pourroit retraire
25 Les cris, les plours et le dolent affaire
Qui leur sourdront. Maistre Pierre non saige,
Qui a trespo pratique et heritaige,
A trop failli a bien ses loys entendre
Qu’a tous blasmoit et d’en savoir l’usaige :
30 Sa grant folour le fait partout reprendre.
Tous mariéz, qui sçavéz le langaige 366c
De voz femmes, le proufit ou dommaige
D’elles avoir, que nulz ne puet comprandre,
Jugéz en vous la folie et oultraige
35 Qu’a fait Mangnin qui va en tapinaige :
Sa grant doleur[1] le fait partout reprandre.
[1] Raynaud corrige en folour
