Balade 916 : Je vous mercy, dames et damoiselles (MCCCXLV)
Autres lettres envoyees aux damoiselles de ma dicte dame d’Orliens
Je vous mercy, dames et damoiselles, 366a
Des prieres que fait avéz pour my,
Quant l’en vous dist de ma mort les nouvelles
Qu’aucuns firent. Et si n’est pas ainsi.
5 Mais en ce voy vo bien et honneur, si
Qu’a tousjours mais toutes vous serviray,
E voz grans biens en tous lieux descripray,
Plus que je fis onques jour de ma vie
En tous les cas ou faire le sçaray.
10 Car je voy bien : qui aime, a tart oublie.
Et apperçoy que pas n’estes de celles
Qui sanz veoir mettent tost en oubli,
Mais vous souvient des mors, bonnes et belles.
La coingnoist on et amie et ami.
15 Se je vous ay en mes dictéz cheri,
Aprés ma mort, bien m’en perceveray,
Quant, moy vivant, vos prieres en ay,
Cuidans ma mort dont je vous regracie
Tant qu’a tousjours vostre servent seray.
20 Car je voy bien : qui aime, a tart oublie.
Or vous suppli, treshumbles columbelles,
Qu’aprés ma mort aiéz de moy mercy.
Dictes pour moy pseaumes et miserelles,
Qu’a voz bienfaiz en pitié [je] m’afy,
25 Moy trespassé, et je pri a Dieu qui
Garde vo corps de doleur et d’esmay
En tout honneur, et aprés le delay
De ce monde qui chascun jour varie,
Doint paradis a vous que g’y verray.
30 Car je voy bien : qui aime, a tart oublie.
L’envoy
Dames d’onneur, damoiselles aussi,
Eustace, d’umble cuer vous mercie
De [voz] biens faiz. Vostres sui, pour ce di,
Car je voy bien : qui ayme, a tart oublie.
