Balade 915 : Ma treschiere et redoubtee dame (MCCCXLIV)
Lettres d’Eustace, en regraciant Madame d’Orliens par balade
Ma treschiere et redoubtee dame,
Je vous merci[1] tresamoureusement,
Quant pleu vous a a souvenir de l’ame
D’Eustace, moy vostre povre servent,
5 Qu’om disoit mort, et si benignement
En avéz fait chanter de vostre grace,
Qu’a Dieu suppli, priere ne li face
Jamais nul jour ne bien durant ma vie 365d
Que vous n’aiéz en ce vo bien et place.
10 De voz gens bien devéz estre servie.
Quant moy povre, qui ne vail une drame
Et qui vous ay servi petitement,
Et qui avéz maint homme et mainte femme
De noble lieu, noble[2] gouvernement,
15 Qui vous servent bien et diligemment,
Et vous[3] souvient d’une pierre de glace
Qui au regart d’eulx n’est c’une lymace,
Un chetis corps qu’om fait mort par envie
Qui encor a de temps vivre et espace,
20 De voz gens bien devéz estre servie.
Et quant a moy, vostre bonté m’enflame,
Et doit faire tout vray entendement
De vous servir. Estre devroit infame
Qui ne vous sert a tousjours loyaument.
25 Car du[4] mort [fait] avéz piteusement
L’ame en prier, afin que Dieu efface
Par voz bienfaiz[5] le pechié qui l’enlace,
Tant qu’avec Dieu puist avoir compaignie.
Et quant voz cuers paradis leur pourchace,
30 De voz gens bien devéz estre servie.
L’envoy
Humble dame, a grant paine cuidace
Que jamais jour vous souveniste d’Eustace,
Lui trespassé, qui de votre escurie
Est [de] long temps. Fouls est qui vers vous glace :
35 Quant vis et mors leur moustréz vostre face,
De voz genz bien devéz estre servie.
[1] Ms. merci de cuer
[2] Ms. de noble
[3] Ms. sous
[4] Ms. e
[5] Ms. meffaiz
