Balade 914 : Je vy en chastel de Boissy (MCCCXLIII)
Autre Balade de Monseigneur d’Orliens et autres seigneurs estans avecques lui ou chastel de Boissy, et comment ilz buvoient d’autant selon la caterve
Je vy en chastel de Boissy
Monseigneur le duc d’Orliens,
Jehan monseigneur, Lebreth aussi
Et leurs gens fort boire liens.
5 Le vin fist moult d’estudiens :
La fut Louvet licencié
Qui [de] Beaune a quatre a crié.
Bruneval[1], par force de vin
Crioit sur tous comme enrragié :
10 Sine dubio, c’est latin.
L’oste n’ot pité ne mercy,
Crie de ses vins et ses biens,
A l’un boit la, a l’autre cy.
Es voyrres ne demeure[2] riens :
15 ― Je boy a toy ! ― Je le retiens !
Dist l’un, a l’autre s’a plegié. 365c
N’eusse esté, je fusse noyé.
Bruneval du mal Saint Martin
Crioit sur tous comme enrragié :
20 Sine dubio, c’est latin.
Labreth n’ot pas le cuer failli,
A tous boit com bons crestiens,
Aufement, Beaumont [et] Canny.
Gaucourt, Garenciere ist des liens
25 Qui jeunes, nouveaux, anciens,
Prunelé, Croisy ont moillié
Voirre, rompu et despecié.
Bruneval qui ot l’esvertin
Crioit sur tous comme enrragié :
30 Sine dubio : c’est latin.
L’envoy
Prince, aprés ce qu’om ot mangié
Et beut tant qu’om estoit blecié,
Vont estuver li pelerin,
De leurs corps firent grant marchié :
35 Touz nuz ont vo chambre assiegié,
Et la Bruneval en la fin
Crioit sur tous comme enrragié :
[Sine dubio, c’est latin.]
[1] Ms. Brunniueil
[2] Ms. demeures
