Balade 913 : Vous ambasseur et messagier (MCCCXLI)
Autre Balade
Vous ambasseur et messagier,
Qui aléz par le monde es cours
Des grans princes, pour besongnier,
Vostre voyage n’est pas cours,
5 Car on quiert tant de divers tours,
De puis que vous seréz ois,
De journees, de mos polis,
De venir au soir et au main.
Mais ne soiéz pour ce esbahis,
10 Tousjours aréz d’uy a demain,
Qui vous durra un mois entier
Voire bien trois, et tous les jours
Vous fault poursuir a dangier
Vostre response. On n’est pas sours
15 De vous respondre par amours :
― Ne soiéz mie si hastis ! 364d
Il fault que vostre fait soit mis
Au conseil, pour respondre a plain.
Attendéz encor, mes amis,
20 Tousjours aréz d’uy a demain.
Il faut parler au chancelier
De vostre fait et a plusours.
Vous vous pourréz bien empeschier
De tenir trop pres nos seignours.
25 Temps passe et tout vient arrebours,
Argent fault hors de son pais,
La desplaisance, qui fait pis.
De teles poursuites me plain
Et des moz dont on est servis :
30 Tousjours aréz d’uy a demain.
L’envoy
Princes, il sont maint estrangier
Qui seulent les cours estrangier,
Quant ilz n’y voient mot certain,
Et n’en veulent plus approuchier,
35 Pour ce mot que nulz homs n’a chier :
Tousjours aréz d’uy a demain.
