Balade 912 : A tous vivans de la foy crestienne (MCCCXL)
Autre Balade
A tous vivans de la foy crestienne,
Pour leurs pechiéz et obstinacion
Tourblans la loy nouvelle et ancienne,
Qui font tous maulx et toute ambicion,
5 Fait assavoir la divine ulcion[1]
Par Jheremie et la sainte escripture,
Que le temps vient que li Dieux de nature
Qui plus ne puet soufrir la chose tele,
Envoyera sur toute creature
10 Larmes de sang et vengence cruele.
Car riens ne vault vie cotidienne.
Chascuns ravist ou tue en traison,
Et ne souffist a nul la chose sienne.
Lucure court, orgueil, detraction,
15 Couvoitise, toute destrucion[2].
Justice fault, amour, pité, ne dure
Crainte de Dieu, car chascun le parjure
Cent foiz le jour, c’est chose universele,
Dont maint auront ceste sentence dure :
20 Larmes de sang et vengence cruele.
Envie court comme entre chien et chienne
En mains paus, en mainte region,
Pour seignourir plus qu’en la loy payenne,
Dont je voy ja naistre division,
25 Le bien commun estre en[3] perdicion 364c
Pour les pechiéz du monde et pour l’ordure.
Je n’espoir plus que le Grant Juge endure,
Mais destruira toute chose mortele[4]
Et a chascun donrra qui fait injure
30 Larmes de cang et vengence cruele.
L’envoy
Prince, pensons a la pugnicion
De Dieu qui fist nostre creacion,
Et retournons humblement dessoubz sele,
Ou brief verrons [tres]grant mutacion
35 De royaumes et renovacion,
Larmes de sang et vengence cruele.
[1] Ms. BNF 6221 unction
[2] Ce vers manque dans le ms. BNF 6221
[3] Ms. BNF 6221 va a
[4] Ms. BNF 6221 Je le vous dy et ma creance est telle
