Balade 911 : Vertus est ville vertueuse (MCCCXXXIX)
Balade 364a
Vertus est ville vertueuse,
Ou Dieux fist vertieusement
Mainte fontaine merveilleuse
En sec lieu merveilleusement
5 Pour arrouser le tenement.
Bons vins a, fromens, soille, avaine,
Moulins jardins, riviere saine
Et qui court contre le souleil,
Sanz tarir vient de vive vaine :
10 Chascun le puet veoir a l’ueil.
Au piet du mont est fructueuse,
Fondee tresdevotement
De mainte eglise precieuse :
Deux crosses, college ensement,
15 Nostre Dame premierement,
Saint Sauveur, et sur le demaine
Saint Jehan. L’autre eglise prochaine
Est Saint Martin de doulz acueil,
Parroche du lieu souverain,
20 Chascun le puet veoir a l’ueil.
Maison Dieu y a gracieuse,
Maladerie et mesmement
Conté, seaulx, justice piteuse,
Tresbon aer, bel esbatement,
25 Brie au dessus, boys largement,
Carrieres, Moymer, la Champaigne,
Et Marne de prés la compaigne,
A Esparnay et a Bussueil :
Bons fruiz a, bestaulx et montaigne,
30 Chascun le puet veoir a l’ueil.
L’envoy
Prince, des le temps Charlemaine 364b
Qui ficha son tref sur la plaine
Devant Moymer, est en escueil
Vertus, qui a moult[1] soufrir paine
35 Des Anglés, par feu gaste et vaine,
Chascuns le puet veoir a l’ueil.
[1] Raynaud corrige en a moult
