Balade 910 : A nobles chevaliers errans (MCCCXXXVIII)
Balade
A[1] nobles chevaliers errans,
Channoines, gens sanz mariage,
A officiers [et] a marchans 363d
Justiciers, conseilliers, l’ouvraige
5 De faire tenir labourage
En leur main, gens, chevaux, harnois
Deffent Eustace, pour les frais,
Les despens et pour la desserte
Des serviteurs qui sont mauvais.
10 A tout compter, c’est toute perte.
Qui fait vignes, li coux est grans,
[Car] bastons y fault a oultraige,
Lyeure, trois royes, dix frans
Pour chascun arpent, vendengage,
15 Cuves, cuvaulx, queux, reliaige.
Et quant tous li labours est fais,
Ou vigne ou li vins est meffais,
Ou pou de despoille y a certe
Avant qu’om ait ses bastons trais.
20 A tout compter, c’est toute perte.
Cilz qui fait labourer les champs
Et qui tient, lui absent, mesnaige
De chartiers[2], bergiers, est meschans.
Rien n’en demeure a son usaige.
25 Loyers, selliers, cordiers, rouaige,
Fevre[3], les soyeurs, les balais,
Les bateurs, les chevaulx de trais,
Ont mainte personne deserte.
Bailliéz a ferme pour vo paix.
30 A tout compter, c’est toute perte.
L’envoy
Prince, je tien l’omme pour saige
Qui ne tient vignes n’eritaige
En sa main. Ait maison couverte,
Baille terres, vignes, gaingnaige
35 A pris d’argent, car queriaige,
A tout compter, c’est toute perte.
[1] Ms. O
[2] Ms. charretiers
[3] Ms. Le fevre
