Balade 909 : Je me fusse marié long temps a (MCCCXXXVI)

Balade de mariage

                        Je me fusse marié long temps a,
                        Se ce ne fust une grief maladie
                        Que [les] maris encourent de pieça,
                        Les medicins l’appellent jalousie,
5                      Qui prant en cuer, en foye, en la vessie.
                        Lors monte ou chief qu’elle grieve et tempeste.
                        Qui se marie, il a mal en sa teste.                                                      363c

                        Et quant le chief tel dolour soufferra,
                        Lors naist au corps trop grant merencolie.
10                    Se sa femme va jouer ça ne la,
                        Puis qu’elle soit belle, douce ou jolie,
                        Tousjours grouche, tousjours merencolie,
                        Se devant lui n’est toudis prompte et preste :
                        Qui se marie, il a mal en sa teste.

15                    Et se cieulz est, jamais jour bien n’ara,
                        Car foul penser a soy l’attrait et lie.
                        Femme jeusne petit le prisera.
                        Ainsi maine chascuns d’eulx male vie.
                        Se jeusnes est et a jeusne partie,
20                    D’un dimenche li semble une orde feste :
                        Qui se marie, il a mal en sa teste.