Balade 908 : Gar toy de l’oiseleur qui prant (MCCCXXII)

Balade

                        Gar toy de l’oiseleur qui prant
                        Les oiseaulx pour chant contrefait,
                        A sa roix soutive qu’il tent,
                        Par soutil langaige deffait.
5                      Gar toy de femme qui te fait
                        Doulz semblant, et ami te nomme,
                        C’est pour toy jouer d’un faulx trait :
                        On ne doit pas croire a tout homme.

                        Avise au venimeux serpent
10                    Qui en la douce herbe se trait
                        Et s’i craiche soutivement,                                                                 359b
                        Si que quant aucuns s’i retrait
                        L’erbe cueillant, lors mort de fait.
                        De son venin point et assomme
15                    Le cueillant, qui lors crie et braint.
                        On ne doit pas croire a tout homme,

                        Ne le parler d’aucune gent
                        Qui semble doulz com miel ou lait,
                        Ou l’en treuve venin souvent
20                    Quant aucun ont a eulx attrait.
                        Ainsi doulz parler se deffait
                        En fiel mortel soubz douce pomme.
                        Donc pour eschiver ce meffait,
                        On ne doit pas croire a tout homme.

                        L’envoy

25                    Princes, saiges est qui aprant,
                        Qui parle pou et qui entent,
                        Qui se taist et qui en soy somme
                        Le parler d’autruy saigement.
                        Pour eschiver paine et tourment,
30                    On ne doit pas croire a tout homme.