Balade 907 : Qui fait par tout les terres apovrir (MCCCXX)
Balade
Qui fait par tout les terres apovrir
Et ressongnier d’y mener marchandise,
Et qu’om n’y puet ne aler ne venir,
Pour les robeurs, en liberal franchise
5 Qu’om ne soit prins, en pardant corps et mise ?
Si fuit chascun tel terre et tel pais
Et si voy po seigneur qui s’en avise.
Justice fault, dont je suy esbahis.
Les uns s’en vont dessus les champs courir :
10 Des plus foibles qu’ilz truvent font leur prise.
Sanz cause avoir, rançonner ou mourir
Les couvendra : qui a tel loy promise
Faulte de sens et male couvoitise
Des biens d’autruy desloyaument ravis,
15 Par le default de raison qui s’i brise,
Justice fault, dont je suy esbahis.
O Hault Juges, qui tout as a pugnir,
Attendras tu bien le jour du Juise
Pour ces granz maulx aux mauvés remerir ?
20 Certes nenil. Ne ceuls qui leur enprinse
N’ont rebouté, toy ne doubtent n’Esglise.
Leurs chars[1] aux vers, leur ame[2] aux Ennemis
Donrras briefmant, d’eulx yert vengence prise.
Justice fault, dont je suis esbahis.
L’envoy
25 Princes mondains, pense chascuns et vise
Que mourir doit, et oste ceste guise
D’autrui rober. Soient les maulx pugnis, 359a
Les bons améz, laissons mauvaise guise
Sanz espargnier nul pour argent ne mise.
30 Justice fault, dont je suis esbahis.
[1] Raynaud corrige en leur char
[2] Ms. leurs ames
