Balade 906 : Poisson salé, char de porc enfumee (MCCCXVIII)
Autre Balade
Poisson salé, char de porc enfumee,
Piteux brouet aréz .xii. en un plat,
Es estuves sanz chambre a cheminee,
Cervoise et pain, la orréz grant debat.
5 Chascun y tient au disner son estat,
Et la seréz servis a l’ordonnance
De vostre hoste, non pas a vo plaisance,
Mais de telz més comme il plaira a lui.
Faire autrement n’est pas en vo puissance :
10 Mal fait mangier a l’appetit d’autruy.
Encor ara nape trop mal buee,
Crasse et orde, noire com cornillat,
Aucune foiz a la table clouee
Sanz plus oster tant qu’il en dure esclat. 358c
15 Mais de laver ne fault faire debat :
Un bacin plain aréz d’yaue. Or d’avance
Qui veult laver. Suasse n’aréz ne jance,
La ne fait on reverence a nullui.
See qui puet, qui ne siet l’oste tance.
20 Mal fait manger a l’appetit d’autruy.
Mais aussitost que la nape est ostee,
Qui vin a but, son fait yroit de plat,
S’il ne paioyt sa porcion donnee,
Et qui faim a, pour neant s’en debat,
25 Attendre fault l’oste comme un prelat
A son plseir. Se jeune est qui veult dance,
[…][1]
Soupper n’ara, dont trop esbahis suy,
J’aime [bien] mieulx la coustume de France :
30 Mal fait mangier a l’apetit d’autruy.
L’envoy
Prince, on a lis, chambre mal ordonee,
Gros draps et durs, sanz fenestre fermee,
D’une coute ma couverture y truy.
Sanz cuevrechief, on a robe emplumee.
35 En refroitouer, par la Vierge honouree,
Mal fait mangier a l’apetit d’autruy.
[1] Vers manquant
