Balade 905 : O doulz pais, terre treshonourable (MCCCXVII)
Balade du noble pais de France
O doulz pais, terre treshonourable,
Ou chascuns a ce qu’i lveult demander
Pour son argent, et a pris raisonnable
Char, pain et vin, poisson d’yaue et de mer,
5 Chambre a par soy, feu, dormir, reposer,
Liz, orilliers, blans draps flairans la graine,
Et pour chevaulx foing, litiere et avoine
Estre servis, et par bonne ordonnance,
Et en seurté de ce qu’om porte et maine[1] :
10 Tel pais n’est qu’en royaume de France !
Justice est la fort dure et pugnissable
Aux malfaicteurs qui veulent offenser.
Aux estrangers est la terre amiable :
Qui n’y meffait, bien puet partout aler
15 Or et argent, marchandise porter,
Et seurement chevaucher le demaine.
Nul desplaisir, nulle chose villaine
Ne s’i fera par force ou par puissance
Qu’il ne faille qu’a raison se ramaine :
20 Tel pais n’est qu’en royaume de France.
Mais ceste loy n’est pas ferme et estable
En pluseurs lieux ou maint seulent rober
Aux bois, en champs, en ville et enestable
Tant que marchans n’y osent cheminer 358b
25 Par le default de justice garder.
Ce scet on bien ou pais d’Alemaigne,
De Morave, Lucembourc et Behaigne :
Qui la est prins, il pert corps et chevance,
Advisent ci, gardent justice plaine :
30 Tel pais n’est qu’en royaume de France !
L’envoy
Prince, en telz lieux fait mauvés sejourner
Ou il convient la cervoise humer,
A l’appetit de l’oste et sa plaisance,
Tel viande qu’il veult aux gens donner,
Boire et mangier, a son vouloir paier :
Tel pais n’est qu’en royaume de France !
[1] Ms. mangue
