Balade 904 : Las ! se Judich ploura pour Bethulie (MCCCXVI)
Balade
Las ! se Judich ploura pour Bethulie, 357d
Rachel aussi pour la mort ses enfans,
Jherusalem dont[1] fist plour Jheremie
Sur son exil qu’il fut prophetisans
5 Pour ses pechiéz, doivent plourer les Frans,
Nevers, Bar, Eu, connestable de France,
Marche, Coucy, l’Admiral qui s’avance :
La banniere porta de Nostre Dame
Contre les Turs. Mains devos muert par lance !
10 De chascun d’eulx ait Dieu mercy de l’ame !
L’an mil .ccc. iiiixx. en Turquie
Sur le septembre, adjoint encor .xvi. ans,
Ot maint baron et le roy de Hongrie,
François, Anglois, Bourgongnons, Alemans,
15 Les pluseurs mors, autres prins des tirans,
Pluseurs fuitis. Plourons ceste meschance,
Vengons leur mort, aions en Dieu fiance,
Prions pour eulx, donnons d’or mainte drame
Aux povres gens, faisons leur secourance.
20 De chascun d’eulx ait Dieu mercy de l’ame !
Nychopoly, cité de payennie,
A ce temps la ou li sieges fut grans,
Fut delaissiéz par orgueil et folie.
Car les Hongres, qui furent sur les champs
25 Avec leur roy fuitis et recreans,
Leur roy meisme en mainent par puissance
Sanz assembler. Ayons tuit souvenance
Des prisonniers que tient Basach soubz lame,
Des mors aussi, pour garder no creance :
30 De chascun d’eulx ait Dieu mercy de l’ame!
L’envoy
Prince, pour Dieu humblement vous supplie 358a
D’avoir tousjours loial chevalerie
Et d’estre humble, qu’orgueil ne vous diffame,
Car Dieu le het, et ne vous fiéz mie
35 En traitreurs dont no gent est perie :
De chascun d’eulx ait Dieu merci de l’ame !
[1] Ms. aussi dont
