Balade 903 : Vous qui tenéz cinq prouvendes ou six (MCCCXV)
Autre Balade
Vous qui tenéz cinq prouvendes ou six,
Tant cathedraux comme collegiaux,
Patronaiges, chappelles neuf ou dix,
Cures aussi pour emplir voz boyaux,
5 Et de voz gens, estes vous bien loyaulx ? 357c
Et pouéz vous bien desservir chascune
En un seul lieu, menans vie commune,
Estat mondain en delectacion ?
Certes nenil. Vostre vie est trop brune.
10 Vous les tenéz a vo dampnacion.
Et en levéz revenue et proufis
Pour enrrichir [vos] hoirs et jouvenciaux,
Dont povres clers, selon les drois escrips
Deussent estre chascun pourveu entr’iaulx
15 Pour servir Dieu. Mais vous estes preciaulx
Qui sanz sçavoir ou par cas de fortune
Ou prieres d’aucun prince ou d’aucune,
Mangéz telz biens par leur promocion.
Departéz les au povre cler qui june :
20 Vous les tenéz a vo dampnacion.
Rendre vous fault les biens du Crucifis,
Clers ou non clers, prestres, officiaulx,
Que vous levéz sanz estre desservis,
Que manguent putains et maqueriaulx.
25 Vous compterés, car li Juges Royaulx,
Qui siet dessus le souleil et la lune,
Congnoist voz faiz et vostre vie enfrune.
Cilz vous fera sa condempnacion
Des biens ravis, qui engendrent rancune :
30 Vous les tenéz a vo dampnacion.
L’envoy
Prestres et clers, qui tenéz telz monceaulx
De chapelles, vous autres, curiaulx,
Des povres clers aiéz compassion,
Repartéz leur ces biens ecclesiaux,
35 Afin que Dieux vous soit propiciaulx :
Vous les tenéz a vo dampnacion.
