Balade 902 : Moult est uns clers qui a bon benefice (MCCCXIV)
Autre Balade
Moult est uns clers qui a bon benefice,
Dont il se puet seurement gouverner,
Foul et cornart, oultrecuide[nt][1] et nice,
Qui mondains veult au secle retourner
5 Pour paine avoir, aucuns pour eulx armer,
Pour le vain nom de leur povre noblesse,
Ou souffrir fault mainte chose qui blesse.
De laissier Dieu dont les clers ont le bien,
Ingrades sont. S’en muerent en destresse :
10 Clers repentiz en nul cas ne vault rien.
N’ilz ne puelent jamais estre propice
Aux ars mondains : on ne fait que moquer
De ce qu’ilz font, soit en quelconque office, 357b
Et leurs parens ne les puelent amer.
15 Tousjours se font en reprouchant clamer :
"- Cler maleureux, aléz chanter vo messe !
S’il leur meschiet, chascun les fuit et lesse,
Ils sont huéz au monde comme chien,
Pour ce qu’ilz vont contre veu et promesse[2].
20 Clers repentiz en nul cas ne vault rien.
Et de cent, un qui encourt en tel vice
N’en verréz pas a bonne fin aler,
Que laide mort ou lay ne le pugnice.
Pour leurs meffais vueillent ci regarder
25 Les clers qui ont asséz pour eulx garder
De faim et froit, qu’issir hors ne les blesse
De l’amour Dieu, et chascun d’eulx ne cesse
De lui servir puis qu’ilz vivent du sien,
Sanz departir, quant pechiéz les oppresse.
30 Clers repentiz en nul cas ne vault rien.
L’envoy
Princes, nulz homs ne doit sa foy fausser.
S’a Dieu le fait, on puet bien esperer
Qu’en autre lieu ne se portera bien.
Si les doit on fuir et rebouter,
35 Car pour certain apparoir puet de cler :
Clers repentiz en nul cas ne vault rien.
[1] Raynaud corrige en oultrecuidant
[2] Ms. promesses
