Balade 901 : Faisons tous bien, et ne nous fions mie (MCCCXIII)
Autre Balade
Faisons tous bien, et ne nous fions mie
En nos pechiéz, en nostre repentence,
En esperant longueur de nostre vie,
Car ce seroit trop grant oultrecuidance.
5 Dieux het pechié en sa perseverence.
Sanz repentir, nous default sa pité.
Orgueil lui put, et l’a en desplaisance :
Congnoissons Dieu en toute humilité.
Car po nous vault mondaine seignourie,
10 Or ne argent, jeunesse ne puissance :
En un moment est no gloire perie,
Se Dieux n’avons tousjours en remembrance.
Nos faiz congnoist, et, par juste balance,
Soudainement nous donne adversité
15 Pugnicion, [et] grief mort nous avance :
Congnoissons Dieu en toute humilité. 357a
Bien demoustra sa fureur en Turquie
Aux crestiens du royaume de France,
Aux Alemans, Anglois, ceuls de Hongrie
20 Que [tous] Basac par leur fole ordonnance
Desconfist lors, par desobeissance
De jeunesse qui het antiquité,
Et nos pechiéz en [trop] grant habondance :
Congnoissons Dieu en toute humilité.
L’envoy
25 Prince, pensons tous a ceste meschance :
Crions merci, aions bonne esperance.
Pensons que ceuls qui prins sont rachaté
Soient briefment, ne demeurt[1] pour finance.
Et en tous cas de viellesce et d’enfance,
30 Congnoissons Dieu en toute humilité.
[1] Ms. demeure
