Balade 900 : Bon sont les chevaliers de terre (MCCCXII)
Balade
Bon sont les chevaliers de terre,
Bon sont les chevaliers de mer,
Bon ouvrier sont qui font le voirre,
Bon laboureur qui scet semer,
5 Bon couvreur qui hault ose ouvrer,
Bon carrier qui cave en carriere,
Bon mineur qui euvre en miniere,
Bon fondeur de cloches a part,
Tous ne sont pas d’une maniere :
10 Chascun est hardi en son art.
Bon est cil qui va l’ancre querre
Et en chastel du mast monter,
Bon fevre qui fait clou et serre
Et touz outieulx pour charpentier[1],
15 Bon ouvrier qui scet arpenter,
Bon masson qui de martel fiere,
Bon charpentier que l’en requiere,
Bon orfevre et soutil lombart
Prestant or a autruy priere :
20 Chascun est hardi en son art.
Bon escheleur homme de guerre,
Bon deffendeur pour rebouter
Sens du saige qu’om va requerre,
Bon mire pour plaies curer,
25 Bon prescheur pour bien sermonner, 356d
Bon paintre pour faire banniere,
Bon armurier fault que l’en quiere,
Chevaucheur qui va main et tart
En peril avant et arriere :
30 Chascun est hardi en son art.
L’envoy
Princes, qui bien vouldra penser
Et l’un et l’autre compenser
Des estas que mondes depart,
Seulz homs ne les puet surmonter,
35 Mais a descendre et a monter,
Chascun est hardi en son art.
[1] Raynaud corrige en charpenter
