Balade 899 : Ceuls qui ne partent de l’ostel (MCCCXI)
Autre Balade
Ceuls qui ne partent de l’ostel 356b
Sanz aler en divers pais,
Ne scevent la dolour mortel
Dont gent qui vont sont envahis,
5 Les maulx, les doubtes, les perilz
Des mers, des fleuves et des pas,
Les langaiges qu’om n’entent pas,
La paine et le traveil des corps.
Mais combien qu’om soit de ce las,
10 Il ne scet rien qui ne va hors.
Car par le monde universel
Qui est des nobles poursuis,
Sont choses a chacun costel
Dont maint seroient esbahis,
15 De la creance, des habis,
Des vivres, des divers estas,
Des bestes, des merveilleux cas,
Des poissons, oiseaulx, serpens fors,
Des roches, des plains, des[1] lieux bas :
20 Il ne scet rien qui ne va hors.
De vir les montaingnes de sel,
Les baings chaux dont maint sont garis,
Le[2] cours desquelz est naturel
Par vaines de soufre tramis,
25 Les divers fruis, ermines, gris.
Minieres d’or, d’argent a tas,
De fer, d’acier, d’estain verras,
De plomb, cuivre, arain, et alors
A toutes gens dire pourras :
30 Il ne scet rien qui ne va hors.
L’envoy
Princes, nulz ne sera sutils, 356c
Saiges, courtois ne bien apris,
Tant soit riches, puissans ou fors,
S’en divers voyages n’est mis
35 En jeunesce pour avoir pris.
Il ne scet riens qui ne va hors.
[1] Ms. et des
[2] Ms. Dont le
