Balade 898 : Je croy qu’entre joueurs de dez (MCCCX)
Autre Balade
Je croy qu’entre joueurs de dez,
Coquins, courratiers de chevaulx,
Sarrasins, Juifs, larrons prouvéz,
Mourdeurs, rufiens et ribaux,
5 Chartiers[1], cabuseurs, traitres[2] faulx,
Pillars, coureurs sur les chemins,
Sorciers, sorcieres et devins,
Depuis qu’Adam fut faiz premiers,
Ne fut plus faulx ne plus malings 356a
10 Que sont partout les maronniers.
Trop a eulx ne vous attendéz :
Aux pelerins font trop de maulx.
En la mer, ce mot entendéz,
En eaue douce sont ilz maulx.
15 Soiéz toudis encontre eulx caux.
Ceuls qu’ilz treuvent sont mieulx que prins,
Aux gens font pis que Sarrazins.
En nave, en galee, en craiers,
N’est au jour d’ui pires venins
20 Que sont partout les maronniers.
Pluseurs sont par eulx desrobéz,
En la mer les gettent tous chaux,
Se riches sont. Et defouléz
Sont les povres par leurs travaulx
25 A paine en treuve on nulz loyaulx :
Eulx donner viande ne vins,
Fors leur loyer, c’est bien estins,
Gré n’en scevent, tant sont loudiers :
Gens ne sont pire[3] a toutes fins
30 Que sont partout les marronniers.
L’envoy
Prince, de puis qu’Adam fut nez,
Ne fut gens plus desordonnéz
Ne plus desloyaulx patarins,
Plus mauvais ne plus faulx trovéz
35 Entre toutes gens esprouvéz
Que sont partout les maronniers.
[1] Ms. Charretiers
[2] Ms. et traitres
[3] Ms. pires
