Balade 897 : De paradis ne sçaroie parler (MCCCIX)
Balade
De paradis ne sçaroie parler,
Ne je n’y fu onques jour de ma vie,
Mais en enfer vous feray bien aler,
Se vous vouléz passer en Lombardie
5 Ou cheminer le pais de Hongrie,
Entre les mons : la sont glaces et nois,
Grans froidures par tous les .xii. moys,
Et[1] habismes jusqu’en terre parfonde,
Et ne croist fors que sapins et rapois :
10 Le pais est un enfer en ce monde.
Charrettes ou chars n’y pourroient passer,
Et le souleil qui est hault n’y luist mie,
N’y n’est oisel qui y puist demourer :
Pour la froideur volent autre partie.
15 Mais le chemin n’a pas piet et demie :
Qui mespasse, s’il chiet, mors est tout frois,
Et se chevaulx s’encontrent a la foys, 355d
La convient [il] que l’un l’autre confonde
Pour les griefs pas et les chemins estrois :
20 Le pais est un enfer en ce monde.
Verdeur n’y a, cerf, biche, ne cengler,
Vignes ne blez, ne nulle melodie,
Ours et chameulx voit on les mons ramper,
Mais leurs vivres que nul d’eulx ne mendie
25 Quierent[2] ailleurs. Du main jusqu’a complie
Sont tenebres, vens et horribles vois.
Et Lucifer qui est des diables roys
Ou hault des mons o ses freres habonde,
Qui en tous lieux depart gelee et frois.
30 Le pais est un enfer en ce monde.
L’envoy
Prince, qui veult corps et ame dampner
D’une grant pecheur, face loy comdempner
Entre ces mons, et a lui mettre bonde
Du remanoir sanz pouoir retourner :
35 Le pais est un enfer en ce monde.
[1] Ms. Et la
[2] Ms. Leur quierent
