Balade 892 : J’ay esté de divers estas (MCCCI)

Autre Balade

                        J’ay esté de divers estas                                                                     354a
                        Et oy crier pluseurs cris,
                        La cote, la chappe, veulz draps,
                        L’engin a prandre les souris,
5                      Pastéz chauls, le sel blanc, le ris,
                        Chastaingnes, frommaiges de Brie.
                        Mais a present suis esbahis,
                        Crier me fault : ― Oublie, oublie !

                        Coffin porter, et le cabas
10                    Des suppliacions toudis,
                        Et une boiste pour les ras
                        Ou mes dons du roy sont escrips.
                        Par moy sont Generaulx servis
                        De ce mestier souventefie,
15                    Mais quant d’eulx ne puis estre ois,
                        Crier me fault : ― Oublie, oublie !

                        C’est un cri qui ne me plaist pas,
                        Devers eulx treuve pou d’amis :
                        Telz me congnut qui parle bas
20                    Pour mon fait. Quant Fortune a mis
                        Aucun hault, lors est ennemis.
                        Saiges n’est pas qui trop s’i fie.
                        S’en mon fait n’est remede mis,
                        Crier me fault : ― Oublie, oublie !

                        L’envoy

25                    Mes seigneurs, je suis desconfis,
                        Se vo pité n’y remedie,
                        Car, comme oublier par Paris,
                        Crier me fault : ― Oublie, oublie !