Balade 891 : Je ressoingne aler au moustier (MCCC)
Autre Balade qui parle de pluseurs truans et truandes, coquins, paillars et vielles repentiers et maquerelles
Je ressoingne aler au moustier,
Pour les larrons de Jhesucrist,
Truans, caymans, qui aidier
Se puelent bien, dont li uns dit :
5 ― Donnéz au povre qui languit
Du mal saint Fiacre en grief dolour,
[…][1]
De saint Mor et de saint Mahieu,
De saint Aquaire et de saint Flour !
10 Mais ce sont tuit larron a Dieu. 353d
Car pluseurs font le potencier,
Qui sont sain, couchans en bon lit.
Toute nuit leurs jambes saingnier
Font par sang et herbes qu’on frit,
15 Tant qu’ilz ne soient escondit.
En cheant font aux gens freour,
Et en escumant grant paour
Par sablon[2] qu’ilz ont et par sieu,
Faingnans cris et horrible plour.
20 Mais ce sont tuit larron a Dieu.
Qui sont puissans leur pain gaingnier,
Et chascun d’eulx d’oiseuse vit,
Que Dieux deffent, et mendier
Ceuls vont, espier le Landit,
25 Et les marchiéz pour leur proufit,
Robans et tuans chascun jour
Les bons marchans, c’est grant horreur[3]
Et les vraiz povres en maint lieu,
Eulx faingnans estre en grant tristour.
30 Mais ce sont tuit larron a Dieu.
L’envoy
Prince, qui chauferoit un four
Pour eulx ardoir, de Dieu l’amour
Aroit. L’apostre saint Andrieu
35 Fait contre telz coquins clamour,
Qui faingnent non pouoir labour.
Mais ce sont tuit larron a Dieu.
[1] Vers manquant
[2] Ms. le sablon
[3] Raynaud corrige en horrour
