Balade 890 : Fuiéz truant, caymant, coquin (MCCXCIX)
Balade
Fuiéz truant, caymant [et] coquin,
Maquerelles, ribaudes, repentiers,
Potenciers, sorcieres et divin,
Ribaulx, paillars, menans oiseuses vies,
5 Par ces moustiers querrans truanderies,
Larrons a Dieu, qui faingnéz divers maulx,
Trainéz soiéz a queues de chevaulx,
Et puis aprés panduz a un gibet !
Adviséz y, baillis et seneschaulx,
10 Prenéz, pandéz, et ce sera bien fet.
L’un dit qu’il a le mal de saint Quantin.
L’autre se fait batre des escourgies[1]
Com hor du sens, et l’autre chiet souvin
Du mal saint Leu. De .xx. maladies
15 Sont entechiéz, en[2] pluseurs abbaies
Et es moustiers, ce dient les ribaux,
De divers sains lamentent comme faulx,
Car chascun d’eulx divers maulx contrefet.
Adviséz y, baillis et seneschaulx,
20 Prenéz, pandéz et ce sera bien fet.
Ilz robent Dieu et le peuple en la fin,
Les truandes font les maqueleries
En truandant, en portant leur cofin,
Et pour robet sont maintefoiz espies : 353c
25 Plus ont de plait qu’estourneaulx, gais ne pies.
Aux bons marchans font es bois mains assaulx,
Robent, tuent, es moustiers, es portaulx,
Font trop d’annuis. L’un crie et l’autre bet :
Adviséz y, baillis et seneschaulx,
30 Prenéz, pandéz et ce sera bien fet.
L’envoy
Vous qui aléz au moustier le matin,
Noble, bourgois, marchant et pelerin,
A telz truans donnéz chascun .ii. caux
D’un gros baston, pour aler leur chemin :
35 A truander ne sront plus enclin,
Mais s’en fuiront sanz chauces et deschaux,
En demoistrant que gueri sont et net.
Adviséz y, baillis et seneschaulx,
Prenéz, pandéz, et ce sera bien fet.
[1] Ms. descourgies
[2] Ms. et en
