Balade 889 : Bon fait oïr, qui n’a ailleurs a faire (MCCXCVII)
Autre Balade des faintis en amours
Bon fait oïr, qui n’a ailleurs a faire,
Ce que pluseurs dient legierement,
Qui vraiz amans se seulent contrefaire
Pour decevoir, et font leur parlement.
5 […][1]
Quant aucune de leur parler les croit,
Elle aime, eulx non, et ainsi se deçoit
Du non[2] amant, qui en cuide estre amee,
Grant avantaige a celle qui ce voit,
10 Que pas ne soit par tel vent assotee.
Si humbles sont pour cuer de dame atraire
Par faintise de doulz parler qui ment,
Que les larmes faingnent sur leur viaire,
Tant sont feru d’amoureus sentement.
15 ― Helas ! dames, regardéz le tourment,
Ce dit aucun, que mon las corps reçoit
Pour vostre amour ! Se pitié n’y pourvoit
Et vo grant bien, je tien ma vie alee !
Mais a telz mos dame adviser se doit,
20 Que pas ne soit par tel vent assotee.
Car l’oiseleur, quant il scet le repaire
D’aucuns oiseaulx, contrefait proprement
Le chant d’iceuls, et en prant mainte paire,
Et les deçoit par son blandissement :
25 Son preu en fait, son escharnissement. 353a
Si font pluseurs, qui bien garde y prandroit
En fait d’amours. Mais qui n’y pourverroit,
Mainte dame seroit par eulx troublee.
Pour ce se gart chascune, ou qu’elle soit,
30 Que pas ne soit par tel vent assotee.
L’envoy
Princesses suers, com le saige serpent,
Qui au doulz son va s’oreille estoupant,
Que prins ne soit, doit dame avoir pensee
Sanz escouter le flajol de tel gent.
35 De refuser soit saige et diligent,
Que pas ne soit par tel vent assotee.
[1] Vers manquant
[2] Ms. nom
