Balade 888 : Vous, curiaulx, que juenesse demaine (MCCXCVI)
Vous, curiaulx, que juenesse demaine, 352c
Aiéz regart a voz predecessours.
Ilz menerent la vie c’om vous maine,
Par certain tamps eurent biens et honours.
5 Envie aprés leur fist trop de dolours,
Et aussi tost que viellesce leur vint,
De leurs bienfaiz a la court ne souvint :
Raiéz furent et reboutéz du tout,
Et ne sceut on que leur estat devint :
10 Foulz est a court qui trop s’i tient et crout.
Tant comme on puet souffrir et traire paine,
En temps moien, on a moult de tristours.
En esperant guerdon c’est chose vaine.
L’en a tantost tristesce, plains et plours,
15 Parlers divers, reprouches, deshonours
Non[1] deservis. Toute joye s’estint,
Ne longuement nulz homs ne s’i maintint,
Tant fust prodoms, qui n’i eust mauvés vout,
Et vous sçavéz de pluseurs qu’il avint :
20 Foulz est a court qui trop s’i tient et crout.
Vie est meilleur mesnaige et plus saine,
Ce voit on bien par noz antecessours,
Qui laissierent celle envie villaine,
Et vesquirent en gracieuses mours
25 Du propre leur, autres de leurs labours,
En liberté : a ceuls tout bien advint.
A un de court fault plus qu’a autres vint.
Franchise vueil, servitute redoubt.
Saiges fut cil qui frans tousjours se tint :
30 Fouls est a court qui trop s’i tient et crout.
L’envoy
Prince, mieulx vault un brin de pourcelaine 352d
Prins franchement, clere eaue de fontaine,
Feves et pois, et pain bis fait a tout,
Que [ne] feroit l’avoir de Charlemaine
35 Prins en maison d’envie et tristour plaine :
Foulz est a court qui trop s’i tient et crout.
[1] Ms. noiz
