Balade 886 : A pluseurs voy maintes choses querir (MCCXCII)
Autre Balade de ceuls qui quierent leur destruction
A pluseurs voy maintes choses querir 351b
Qui sont cause de destruire leurs corps,
Terre et avoir, l’ame faire perir,
Par les grans faiz qu’ilz font par leur effors
5 Pour vaine gloire avoir, et que dehors
Soit leur vain nom publié entre gent.
Du bien commun faire sont negligent,
Et des foulz vont acomplir les requestes
Ou raison n’a ne cause souffisent :
10 Ceuls qui ce font, sont plus que droictes bestes.
Au contraire vueil a tous requerir
Paix et amour, qu’on prie pour les mors,
Qu’on aime Dieu, qu’on le vueille servir
Et aux povres donner de ses tresors,
15 Et qu’om laisse ces pechiéz vilz et ors
De couvoiter terres, joyaulx, argent,
Trop grans estas, qui font maitre indigent,
Pour acomplir soul vouloir de leurs testes,
Qui en la fin las et povres les rent.
20 Ceuls qui ce font, sont plus que droictes bestes.
Ne vueille l’un par mal l’autre ferir,
De conscience ait chascun le remors,
Estat selon qu’om a terre tenir,
Et moins encor estre de vertus fors.
25 Congnoistre Dieu, charitable en confors
Estre, en ses faiz courtois et diligent,
Et que l’en soit a bien faire aherents
Piteux de cuer, gracieus et honnestes,
Et saichent tout qu’en faisant autrement
30 Ceuls qui ce font, sont plus que droictes bestes.
