Balade 885 : Qui veult fuir la persecucion (MCCXCI)
Autre Balade et les remedes contre ladicte epidemie
Qui veult fuir la persecucion
Et le peril d’epidemie avoir,
Vivre le fault en consolacion.
Du lieu regnant le couvient remouvoir.
5 Pain cuit d’un jour, bon vin cler recevoir. 351a
Poucins, chapons en rost, chars de pourceaulx,
[Ne de chevres, lievres ne de toreaux,][1]
De cerfs, de buefs ne mangiéz nullement,
Oes, cannes[2] ne poissons lymonneaulx,
10 Se vous vouléz vie avoir longuement.
Uséz d’un mes sanz prolongacion
De longuement a la table seoir.
Fuiéz gros air, toute corrupcion.
Vinaigre uséz, osille a vo pouoir
15 En vos sausses, et si vous faiz sçavoir
Gingembre fault, safren est bons et beaux.
La canelle, vergus, oingnons, poreaulx,
Les aulx aussi fuiéz generalment,
Potaiges, choulz, laiz, fruiz viéz et nouveaux,
20 Se vous vouléz vie avoir longuement.
Fuiéz les lieux de delectacion,
Soiéz joieux sanz le cuer esmouvoir,
Feu net et cler de genevre en saison
Ou jeune bois faictes en chambre ardoir,
25 D’eaues roses vous devéz pourveoir,
Odeurs porter, robes plaisans, joyaulx,
Joye mener, conserver entre ceaulx
Que vous améz, et eulx vous ensement,
Et vous garder des faiz luxuriaux,
30 Se vous vouléz vie avoir longuement.
L’envoy
Prince, encor fault faire purgacion
Sanz differer l’evacuacion
Que chascun doit avoir naturelment,
User d’eaue de bonne region
35 Ou flums courans par moderacion,
Si vous vouléz vie avoir longuement.
[1] Vers manquant restitué d’après le ms. BNF 6221
[2] Ms. BNF 6221 canars
