Balade 881 : De tous maulx dont Dieu puet garir (MCCLXXXVII)

Autre Balade comment l’auteur maudit cellui qui le requerra de combatre

                        De tous maulx dont Dieu puet garir,
                        D’epidimie et mort soudaine,
                        De gravelle puist il mourir,
                        De la pierre et goute migraine,
5                      D’esvertin, de fievre quartaine,
                        Le mal saint Leu le puist abatre,
                        Dieux lui doint la sanglante estraine
                        Qui me requerra de combatre !

                        Ydropiques puist devenir !
10                    Emfléz soit comme est une yraigne !
                        Ses jours puist ethiques fenir !
                        Es boyaulx colique le praigne !
                        Toute deshoneur lui avaingne
                        Partout ou homs se puet embatre !
15                    Puist cilz mourir de mort villaine
                        Qui me requerra de combatre !

                        Ne m’y sçaroie maintenir :
                        Tel requeste ne m’est pas sayne,
                        Ne je n’en vueil riens acomplir,
20                    C’est ma response toute plaine.
                        Quiere Roland ou Charlemaine,
                        Qui se veult a tel gieu esbatre,
                        Non pas moy. Hors du sens devaine
                        Qui me requerra de combatre !

                        L’envoy

25                    Prince, je ne sçay coup ferir                                                               350a
                        Fors que mangier, boire et dormir :
                        Osté ce, maleur a cil quatre.
                        Ne me vueille nulz requerir !
                        En enfer puist faire bruir
30                    Qui me requerra de combatre !