Balade 882 : De males dagues de Bourdeaulx (MCCLXXXVIII)
Autre Balade de la maledicion sur ceuls qui requierent a faire armes
De males dagues de Bourdeaulx,
Et d’espees de Cler[e]mont,
De dondaines et de cousteaulx
D’acier qui a Milan se font,
5 De haiche a martel qui confont,
De croquepois, de fer de lance,
D’archegaie qu’om gette et lance,
De faussars, espaphus, guisarmes
Puist il avoir plaine sa pance,
10 Qui me requerra de faire armes !
De canons, pierres[1] et carreaulx,
D’espingales, du feu second,
D’engins, de truye, de mereaulx
Qu’ilz departent quand ilz s’en vont,
15 D’arc perilleux qui fiert parfont
Et qui soudainement s’avance,
Puist estre mis jusqu’a oultrance,
Et tousjours soit en plours et larmes,
En doleur, en desesperance,
20 Qui me requerra de faire armes !
Des maces de Damas, de fliaux,
Des piques que les Flamens ont,
De haucepiéz qui sont ysneaulx,
De plommees qui corps deffont,
25 De broches, d’espiéz telz qu’ilz sont,
De faulx trenchans sanz esperance
De guerir, soit mort ou en trance 350b
Cilz, ou tu qu’ilz soies qui t’armes !
Perdre puist honeur et vaillance,
30 Qui me requerra de faire armes !
L’envoy
Princes, d’enclumes et marteaulx,
De cuivre, d’arain, de fuseaulx,
De fer, d’enchantemens, de charmes
Soit feru parmy les boyaulx
35 Et assommez comme uns pourceaulx,
Qui me requerra de faire armes !
[1] Ms. de pierres
