Balade 879 : Las ! dont sont venus tant d’excés (MCCLXXXIV)
Balade
Las ! dont sont venus tant d’excés ?
La conjunction des planettes
Et signes, qui par leurs procés
Ont tant de mortalitéz fectes
5 Au monde entre diverses sectes,
Genre guerres et autres maulx,
Horribles pechiéz, grans deffaulx
De biens, du vent, qui si nous boute
Et frape les oeulx des plus haulx
10 Tant qu’a paine veons[1] nous goute.
Il couvient, ou que telz accés
Viengnent du ciel et de ses mettes,
Ou des grans pechiéz qu’avons fes
Dont Dieux veult exiger les debtes,
15 Car nos euvres sont contrefectes.
Ingrades li faisons assaulx,
Et contre la loy sommes faulx,
Perseverens sanz avoir doubte
En trop de pechiéz generaulx
20 Tant qu’a peine voyons nous goute.
Et si vient vengence de pres :
Plus de dix palies nous a trectes,
De pluseurs voions le decés
Et que noz vies sont ja blettes
25 Sanz amender, car les pellettes
D’oubliance et les grans assaulx
De couvoitise ont fait bersaulx
Aux oeulx. Ce la clarté reboute
Des nobles vertus cardinaulx,
30 Tant qu’a paine voyons nous goute.
L’envoy
Prince, ou les oeulx semblent touz nés,
Du chief et du cuer sont deffés,
Et congnoissance se pert toute.
En mal perseverons adés :
35 De pis en pis vient nostre ples
Tan qu’a paine voyons nous goute.
[1] Raynaud corrige en voyons
