Balade 878 : Exemple du temps ancien (MCCLXXXIII)
Autre Balade des bonnes gens fu temps ancien
Exemple du temps ancien,
Des bonnes gens et des mauvais,
Soit sarrasin, juif, crestien,
De leurs vices, vertus ou fais, 348c
5 Comment ilz ont esté deffais
Ou eslevéz pour leurs vertus,
Tous telz exemples sont perdus.
On les oit, mais on n’en fait compte,
C’est bien dit, queréz le surplus.
10 L’en ne doubte pechié ne honte.
Ly plus grant prince terrient
N’ont espoir de mourir jamais,
Et si n’emportent que le bien,
Se fait l’ont, pour l’ame estre en paix,
15 Aprés la mort. Et les relais
Du bon renom est espandus
Au monde, se fait l’on ça jus.
Et par le contraire redonde
Mauvais nom, dont maint sont confus.
20 On[1] ne doubte pechié ne honte.
Que ne pensons nous au moyen
Et a le fin ? Noz grans palais
Aprés la mort ne nous font rien.
Nous sommes vilz, hideux et lais,
25 Vivans avons doleurs et plais,
Guerres, maulx divers et le plus.
Sommes chaulz, froiz, mouilliéz, emplus.
Nostre vie sur pou se fonde,
En orgueil muerent grans, menus.
30 L’en ne doubte pechié ne honte.
L’envoy
Prince, tout ne vault deux festus.
Nous sommes foulz malostrus,
Nulz a exemple rien n’acompte.
Noz maulx et pechiéz sont conclus.
35 Tout va ce que dessoubz dessus.
L’en ne doubte pechié ne honte.
[1] Raynaud corrige en L’en
