Balade 875 : Tresreverent pere en Dieu, sanz la foy (MCCLXXX)

Balade

                        Tresreverent pere en Dieu, sanz la foy,
                        J’ay eu en my trop legiere creance,
                        Car j’ay tenu plus grant chose la loy
                        Que de la foy qui a pou d’aliance,
5                      Quant j’apperçoy que maint, sanz deffiance
                        La destruisent et la mettent en gaige
                        Sanz rachater, mais la loy par usaige
                        Quiert au jour d’ui de non la foy tenir,
                        Et qui la croit en maint lieu n’est pas saige.
10                    Pleges vault mieulx, qui y puet advenir.

                        Et quant ainsi perdre et perir la voy,
                        Et [que] plus n’a effect fors couvenance
                        Entre les clers, bien esbahir m’en doy,
                        Et les gens laiz, dont vient ceste ordonnance.
15                    Ce fait la loy qui contre foy s’avance,
                        En lui clouant du voir dit le paissaige,
                        Et absoult ceuls qui servent de langaige                                          347d
                        En lieu de foy, qu’ainsi fait pervertir.
                        En croire tost ont maint souvent dommaige.
20                    Pleges vault mieulx, qui y puet advenir.

                        Et pour ce a vous bien confesser me doy
                        De croire ainsi, dont j’ay grant repentence,
                        Quant on n’a pas rencoyé devers moy
                        Un prest que fis. Mais c’est par oubliance.
25                    En saint Remy n’aray jamais fiance,
                        Quant failli m’a, ou j’enveoy messaige :
                        J’eusse aussi tost prins un ostoir sanz caige
                        Comme mon prest qui ne veult revenir.
                        De foy neant, car a present le say je,
30                    Plege[s] vault mieulx, qui y puet advenir.