Balade 876 : Utile chose est des ars mecaniques (MCCLXXXI)
Autre Balade
Utile chose est des ars mecaniques
Et tresnoble des .vii. ars liberaulx :
Par les premiers se font toutes fabriques,
Euvres de mains et labours de chevaulx,
5 Villes, citéz, orfavrerie, esmaulx,
Et des peuples tout le gouvernement,
Vestir, chaucier et vivre honnestement,
Ne sanz ces ars n’aroit peuple duree.
Mais des .vii. vient tout le sentement
10 Qui aux autres ont leur regle donnee.
Gramaire aprant a tous lettres publiques,
Qui des bas lieux fait montrer aux plus haulx.
Logique aprés leur moustre les pratiques
De discerner entre le voir et faulx[1].
15 Astrologe, des beneurtéz, des maulx
Des temps futurs juge naturelment
Aux estoilles, et a son jugement
Pour carculer Arismetique agree, 248a
Compte et nombre. Ces ars font saigement
20 Qui aux autres ont leur regle donnee.
Geometrie est ars bien autentiques
De mesurer et de faire apparaulx
Pour maisonner, forgier choses antiques,
Compasser tours, eglises et chasteaulx.
25 Rethorique fait a droit parler ciaulx
Qu’elle introduit en tous cas proprement.
Et Musique est le doulz assentement
De sons, de voix. Medecine approuvee,
De ces .vii. ars est l’assouagement
30 Qui aux autres ont leur regle donnee.
L’envoy
Princes, l’en doit amer parfaictement
Ces ars partout, et tresnotablement.
Les acueillir en chascune contree,
Eulx honourer et traictier doucement.
35 Les seigneurs sont, ce voit on clerement,
Qui aux autres [ont] leur regle donnee.
[1] Ms. le faulx
