Balade 874 : Qui aime bien, il a pou de repos (MCCLXXIX)

Autre Balade

                        Qui aime bien, il a pou de repos,
                        De son amour toudis perdre se doubte.
                        Il tremble, il frit, il n’a ne cuir ne os,
                        Cuer ne penser ou paour ne se boute.
5                      Il craint, il plaint, il ne repose goute.
                        Tele est Amour entre ami et amie.
                        Toudis enquiert, cerche, oreille et escoute :
                        Onques Amour ne fut sanz Jalousie.

                        Si n’en doit on pas dire villains mos,                                                 347c
10                    Ne l’appeler fausse, vielle ne glote,
                        Si comme on fait. Qui la blasme il est folz,
                        Car s’elle fust desloial ne estoute,
                        Amour l’eust pieça destruite toute.
                        Mais pour son bien l’a en sa compaignie,
15                    C’est son escu, sa servant, son escoute :
                        Onques Amour ne fut sanz Jalousie.

                        Qui n’aime a droit, il est d’elle forclos,
                        De ce qu’il het en tel cas ne fait doubte,
                        Donc est Amour en Jalousie enclos.
20                    Dame et ami l’un de l’autre fordoubte,
                        Et bon signe est de suir droicte route,
                        De vray Amour : jaloux ne seroit mie
                        Cilz qui harroit, pour ce ne la reboute :
                        Onques Amour ne fut sanz Jalousie.