Balade 873 : Puis que li homs puet sa besongne faire (MCCLXXVIII)
Autre Balade
Puis que li homs puet sa besongne faire
Par serviteur qui le fait loyalment,
Il se met hors de grant doleur et haire,
Et si en puet vivre plus longuement.
5 Car qui de tout a le gouvernement,
Il est troubléz d’esperit et de corps,
Penser le fault et dedenz et dehors
Pour son estat soustenir et avoir,
Ou decheoir pourroit en ce cas lors,
10 Car au jour d’uy nulz ne fait son devoir.
Nulz ne pourroit le grant anuy retraire
De ceulx qui ont a administrer gent,
Qui encor sont a leur seigneur contraire
Et a ouvrer tardif et negligent.
15 Deux fois huchier ne [se] font pas, mais cent : 347b
S’on dit a l’un : ― Grant honte est que tu dors !
Va besongnier ! Adonc vient li descors,
Grans riotes fault illec recevoir,
Taire et soufrir. Mieulx vauldroit estre mors,
20 Car au jour d’uy nulz ne fait son devoir.
Ainsi ne font administreur que braire,
Vivres querir pour mesgniee et argent,
Chevaulx, harnoiz, pour chevauchier ou traire.
Administré vivent bien saigement,
25 Vestus, peuz sont, gaingnent largement,
Et si font po. C’est uns dolens remors,
Veu que po vault de terres ly rappors :
Qui bien vourroit les mises concevoir,
L’en y pert tout, de ce suis bien recors,
30 Car au jour d’uy nul[1] ne fait son devoir.
L’envoy
Princes, mieulx vault selon mon jugement
Baillier le sien a ferme ou autrement,
Qu’avoir charge de mesgnee et devoir,
Pour gouverner maint mauvés garnement.
35 Donc qui le fait, mainte foiz se repent,
Car au jour d’uy nulz ne fait son devoir.
[1] Raynaud corrige en nulz
