Balade 872 : L’en souloit presenter jadis (MCCLXXVII)
Autre Balade des vins que on souloit anciennement presenter aux baillis et juges
L’en souloit presenter jadis
Aux juges et baillis royaulx,
Dont li usaiges est faillis,
Des meilleurs vins, viéz et nouveaulx
5 Qu’om peust finer, en deux vaisseaulx
Cours, gros, ventrus et a deux mains.
Mais pluseurs s’en passent au mains
Qui font bien du sextier chopine,
Dont je, comparadour, me plains,
10 Les clers et ceuls de la cuisine.
Que sont devenues perdris,
Faisans, venoisons, lapperiaulx,
Lyevres, pigons, connins, cabris,
Oues, chappons, poucins, aigneaulx,
15 Carpes, lus, braymes et barbiaux,
Poissons de mer, frommaiges sains ?
Contre honneur sont les dons restrains.
Il n’est qui donne une geline,
Dont je, comparadour, me plains,
20 Les clers et ceuls de la cuisine.
Qui querons estre resaisis
Des biens empeschiéz et par ceaulx
Qui du faire ont esté remis
En nous empeschant telz morceaulx.
25 Soient, nonobstant [les] appeaulx,
De telz presens faire contrains,
Viande et vins a deux pos plains,
Pour recouvrer nostre saisine,
Dont je, comparadour, me plains,
30 Les clers et ceuls de la cuisine.
L’envoy
Prince, pas ne suis esbahis
Se les gens eschars sont hais
Et s’en meffaisant sont ratains,
Quant par eulx bon usaige fine,
35 Dont je, comparadour, me plains,
Les clers et ceuls de la cuisine.
