Balade 871 : O Rebeca, fondee sur saigesce (MCCLXXIV)
Autre Balade
O Rebeca, fondee sur saigesce,
Saire loyal a son espoux Thobie,
Judith, Hester, tu, rommaine Lucresse,
Penelope, ne vous comparéz mie,
5 A la bonté de ma dame et amie,
N’a sa beauté Palax, Juno n’Elayne,
Marthe en maintien, en pité Magdelaine,
Ne en honneur Genievre, Yseult, Flourance,
Car ce seroit comparison trop vaine.
10 Onques ne fut tele a mon esperance.
Car de parler saigement est l’adresse,
De loyauté, d’onneur, de courtoisie,
Ferme de cuer, de tresor garderesse
Que vierge doit avoir en sa baillie,
15 Gente de corps, belle, plaisant et lie,
Bonne en tous cas, de toutes vertus plaine,
Humble en atour, en pité souveraine,
Sanz trop ne pou gouverne en souffisance
Estat moyen, en pacience maine :
20 Onques ne fut tele a mon esperance.
Et quant a Dieu, elle oit chascun jour messe, 346c
Ses heures dit de la vierge Marie.
Elle garde jeusnes, veuz, promesse,
Aux povres Dieu fait aumosne et aye,
25 Chascuns l’ayme, ne de nul n’est haye.
Sanz oiseuse, tousjours traveille et payne,
Sobre en mangier, ne trop ne po mondaine.
Chascuns en li prant pour son bien plaisance,
Et la saincte vie qu’elle demaine.
30 Onques ne fut tele a mon esperance
L’envoy
Prince[1], eureux est qui a tel dame adresse,
Car il n’est or, royaume ne richesse
Qui puist valoir, ne nulle autre habondance
De tous les biens, dame de tel prouesse,
35 Dont tout honnour vient, paix, amour, leesse :
Onques ne fut tele a mon esperance.
[1] Ms. Princes
