Balade 870 : On parle de paons rostis (MCCLXXIII)
Autre Balade comment chascun veult mangier des trippes
On parle de paons rostis,
De turterelles, de pigons,
D’allouettes et de perdrix,
De faisans, de connins, d’oisons,
5 De grues, oes et chappons
Et d’autres volilles en terre.
Mais je ne voy viande querre
Dont l’en face moins de dangier 346a
Que de tripes, tous temps ont guerre.
10 Chascuns veult des tripes mangier.
On en a de vache et brebis,
De buefs, de pourceaulx, de moutons,
Boyaulx culliers, pance et le pis,
Teste de veau, les trotignons,
15 Foye double, rate, rongnons,
Dont l’en suelt l’un l’autre requerre.
Quant l’un s’en vient, lors l’autre y erre.
S’elles flairent sur le rostier.
Maint son nez en estoupe et serre
20 Chascuns veult des tripes mangier.
Car tripes sentent leur pais :
On treuve bien du bran au fons.
Lors sont compaignons esbahis :
― Fy, fait l’un, que bran ne mangons !
25 L’autre dit : ― Prenéz des porgons,
Ou vous pourréz puour acquerre.
— Non feray : verséz en ce voirre.
Que l’en puist la vielle escorchier
Qui les vendit, qui les enerre ! »
30 Chascuns veult des tripes mangier.
L’envoy
Princes, les petis compaignons
Ayment trippes, aulx et oingnons,
Car on en fait maille et denier,
35 On s’en esbat a genoillons,
On en dort, on en fait ors sons.
Chascuns veult des tripes mangier.
