Balade 869 : J’ay leu les faiz d’Adam et de Noé (MCCLXIX)
Autre Balade d’Adam, de Noé et de leurs enfants mors et que touz mourrons
J’ay leu les faiz d’Adam et de Noé,
De Sem, de Cam, ses enfans, et Japhet,
Et de la grant Babiloine cité
Et de la tour qui n’ot pas son parfet,
5 Ou la langue fu confondue au net
Et en pluseurs langaiges transmuee.
J’ay eu les faiz des Troyens [et] d’Enee,
D’Ector le fort et du roy Alixandre,
Du roy David, de Judas Machabee.
10 Mais en la fin les truis touz mors et cendre.
J’ay leu les faiz du vaillant Josué,
Du roy Artus, de Cesar le parfect,
Charles le grant, Godefroy l’onouré, 345c
Les haulx conquests que les Rommain ont fet,
15 Comment ilz ont tout royaume deffect
Et la force du monde subjuguee,
La monarchie a eulx atribuee,
Soubz leur treu tout le monde fait rendre
Sanz excepter province ne contree.
20 Mais en la fin les truis touz mors et cendre.
J’ay leu aussi en la divinité :
Saint Augustin, que l’escripture met,
Jeroyme, Jehan de grant aucorité,
Hugue, Bernart qui maint livre ont complet,
25 Autres es loys dont l’en maintient le plet.
Guerre civile est par eulx demenee,
Philosophes de haulte renommee,
Maçons, ouvriers, qu’om ne sçaroit comprandre
En divers ars leur science approuvee.
30 Mais en la fin les truis tous mors et cendre.
L’envoy
Princes, quant j’ay en grant prolixité
Veu et couru ce que j’ay recité,
Et que je puis de tous les faiz entendre,
Il fault mourir, ce m’a trop espanté
35 Pour mon salut : nul d’eulx n’est eschapé.
Mais en la fin les truis touz mors et cendre.
