Balade 868 : Ou nostre loy ne seroit mie vraye (MCCLXVIII)
Autre Balade que nous devons craindre la vengence divine pour noz pechiéz
Ou nostre loy ne seroit mie vraye,
Ou les vengences viennent pour noz pechiéz
Par Pharaon se preuve en mainte playe
Dont Egipte fut durement plaiéz,
5 Son peuple aussi et en la fin noiéz,
Quant le peuple d’Israel envahirent,
Perseverens, et ne se repentirent
Pour signe nul que Moyses eust fait :
Par leur orgueil en Rouge Mer perirent,
10 Car Dieux pugnist chascun de son meffait.
Ne soit homme qui a mal faire essaye,
Mais se gart bien qu’il ne soit entechiéz
De vice nul qui mortelment le plaie
Contre la loy, dont Dieu soit courrociéz.
15 Et s’il le fait, soit tantost radreciéz
En repentant. Par orgueil ange cheirent
En fons d’enfer, ou leurs pechiéz les mirent,
Et ainsi sont par orgueil diables fait.
Eve et Adam par pechié trop souffrirent,
20 Car Dieux pugnist chascun de son meffait. 345b
Les grans pecheurs soudainement [il] paye,
Jus les verse quant plussont exauciéz.
S’il se meffont, n’est mal qu’il ne leur traye,
Et se bien font, ilz sont de lui aidiéz,
25 Le peuple aussi et si non, touz meschiéz
Leur sont presens, a honteuse fin tirent
D’ame et de corps, pluseurs l’exemple en virent,
Et chascun jour le voit l’en tout a fait :
Foulz furent ceuls qui le mal ne guerpirent,
30 Car Dieu pugnist chascun de son meffait.
L’envoy
Princes, peuples, toutes gens, aviséz
De faire bien, et le mal destruisiéz,
Pour eschuer mort, pestillence et lait,
Faulte de biens, famine et autres griéz.
35 A repentir trop tart ne vous fiéz,
Car Dieu pugnist chascun de son meffait.
