Balade 867 : Basiliques, griffe de lyonnesse (MCCLXVII)
Autre Balade de la mort en vieille personne
Basiliques, griffe de lyonnesse,
Tigre courant, lesarde envenimee,
Jarge de nuit, nature de singesse,
Pie janglant, cornaille diffamee,
5 Escorpion, couleuvre entoritillee,
Chien qui blandist de la queue et puis mort,
Du feu d’enfer soiéz vous embrasee
Tant que mourir puissiéz de male mort !
En monde n’a de vous plus felonnesse,
10 Langue trenchant, com rasoir afilee,
Qui en mesdit contre toute s’adresse,
De faulx semblant couverte et afublee.
Mensonge n’est que n’aiéz controuvee,
Sur les bonnes gettéz voz dars a tort :
15 Du feu d’enfer soiéz vous embrasee
Tant que mourir puisséz de male mort !
Car vous haiéz tout honeur et noblesse,
Villenie est en vous enrracinee,
Si que chascuns qui vous congnoit vous lesse.
20 De male heure fustes [vous] onques nee !
Est il aise qui a tele espousee
Qui touz maulx fait et de tous maulx se tort ?
Du feu d’enfer soiéz vous embrasee
Tant que mourir puissiéz de male mort ! 345a
L’envoy
25 Dame d’orgueil et de tout mal princesse,
Desdaingneuse, haultaine, tanceresse,
Qui d’esmouvoir chascun fait son effort,
Dyables[1] en vous ont prins leur forteresse
Qui en brief temps chanteront vostre messe.
30 L’ame de vous leur est pieça donnee,
Dont saint Michiel ne leur fera ja tort.
Du feu d’enfer soiéz vous embrasee
Tant que mourir puisséz de male mort !
[1] Ms. Les dyables
